ஒரு முத்தம் நிகழ்ந்தது

1. ஒரு முத்தம் நிகழ்ந்தது

அந்தி வெயில்
கொஞ்சம் குளிர் உன்
குரலின் அணைப்பில்
வானத்திலேறிய அது
நிலா ஆனது

ஃ
 

2.

மலர்தலின் ரகசியம்
மலர்ந்தேதான் கிடக்கிறது

ஒரு நினைவின் வரி
என்னை எழுதிச் செல்ல

வல்லூறுகளின் வலிவு உண்டாவென
வண்ணத்துப் பூச்சி இறக்கைகளைச் சோதிக்கிறீர்கள்

என்வரையில் –
இரண்டும் பறப்பன

வல்லூறின் கனவில்
வண்ணத்துப் பூச்சி யாவதே
எளிய விருப்பம்

ஃ

 
3.

♥
வெளிச்சத்திற்கு நிழல் போல
இருளுக்குள் ஒளி

• மூடிய இமைகள் விழி திறக்க –

♥
நான் அங்கு இல்லை
நான் அங்கு வேண்டும்
உனதறையின் பூ ஜாடியாக

♥
கடலில் கிடைத்த வலம்புரிச் சங்கு
அறிந்த உன்னுடலாக

உடலை அறிவது
மனதை அடைவதாக
(நினைத்துக் கொள்கிறேன்)

-மனத்தினளவு
உடலின் கடல்-

♥
முடிவின்மையின் முடிவைக் கேட்டால்
முத்தம் என்கிறாய்♥

ஃ
 
4.

நீ –
பறப்பதை விடுதலை என்கிறாய்

அமர ஒரு இடமில்லாமல்
பறந்து பறந்து பறந்து…..

ஃ

படைப்பு:

பிருந்தா சேது

சே.பிருந்தா (பிருந்தா சேது), கவிஞர். எழுத்தாளர். திரைக்கதை ஆசிரியர்.